O Concello de Porto do Son sumouse a unha nova edición de Xuntos Polo Nadal (dende Noiteboa até Reis). Trátase dun programa de envellecemento activo da Xunta (Consellería de Política Social e Igualdade) e os concellos para achegar compañía, lecer e actividades creativas as persoas maiores de 60 anos, co fin de evitar que pasen as festas en soidade. Levarase a cabo nas Residencias de Tempo Libre da Xunta (en Carballiño e en Panxón) e é un programa cen por cen gratuíto.
As persoas solicitantes poderán optar entre tres quendas, das que só se poderá elixir unha:
• Do 23 de decembro ao 7 de xaneiro (16 días)
• Do 23 de decembro ao 30 de decembro (8 días)
• Do 31 de decembro ao 7 de xaneiro (8 días)
As solicitudes, acompañadas do informe social e da declaración responsábel, formularase nos modelos establecidos ao efecto e estarán debidamente cubertas e asinadas pola persoa que corresponda. Estes impresos están á disposición das persoas interesadas na páxina web de Política Social.
As solicitudes presentaranse preferiblemente por vía electrónica a través do formulario normalizado PR004A.
O prazo de inscricións xa está aberto e remata o 25 de novembro.
As persoas de Porto do Son que precisen máis información sobre o programa poden acudir á Área de Benestar Social do Concello de Porto do Son ou chamar ao 981 867 414, e tamén visitar a web municipal.
