A Libraría Social ULA, con sede na Serra de Outes (na rúa da Capela) vai dar acollida esta semana a dúas interesantes actividades creativas e culturais. O venres 14 de novembro recalará na ULA o escritor galego Fran Alonso, autor de Males de cabeza (entre outras xoias da nosa literatura), a partir das 19.00 horas. Alonso ofrecerá ao público de Outes un recital poético e audiovisual baixo o título Véndoche un poema, que é tamén o título da máis recente creación literaria de Alonso: un libro transgresor que dispara poemas á diana da comunicación máis poderosa do noso tempo: a publicidade.
Ademais, ULA albergará a fin de semana un obradoiro de fotografía estenopeica, un convite aos asistentes a construíren a súa propia cámara e facer as súas primeiras fotos estenopeicas. Será unha cita para todos os públicos, impartida por Eutropio Rordríguez. Desenvolverase o sábado 15 e o domingo 16 de novembro e terá 9,5 horas de duración. Levarase a cabo o sábado de mañá e de tarde e domingo pola mañá.
Máis información en info@ulalibrariasocial.com.
Para quen non o saiba, a fotografía estenopeica é a técnica mediante a cal obtéñense fotografías e negativos sen practicamente nada de equipo. Realízase cunha cámara estenopeica, unha das cámaras fotográficas máis sinxelas, dotada de película fotográfica e unha lámina dotada dun buraco do grosor dunha agulla. A este buraco denomínaselle “estenopo” e dá nome á técnica.
.
