A praza do Concello de Ribeira encheuse este sábado 8 de novembro de veciñas e veciños que participaron no magosto popular organizado polo BNG, Galiza Nova e a Asociación Cultural Altofalante, nunha xornada que combinou festa, tradición e cultura.
Dende as 19:30 horas, centos de persoas achegáronse á praza para desfrutar dun completo programa que comezou coa presentación do libro infantil O Magosto de Brais, do autor ribeirense Jorge Pérez Sampedro. A actividade espertou un grande interese entre o público máis novo e as súas familias, que puideron compartir cos protagonistas da obra o espírito desta celebración outonal.
A tarde continuou con xogos populares, música a cargo do DJ Jalaiko e o reparto gratuíto de castañas asadas, que contribuíron a crear un ambiente festivo e participativo. Xa entrada a noite, a queimada popular dirixida por Nando Llon reuniu a un gran número de asistentes, que acompañaron o tradicional conxuro antes de dar por pechada a xornada.
O portavoz do BNG en Ribeira, Luís Pérez Barral, mostrouse satisfeito polo éxito da convocatoria:
“Foi unha tarde-noite marabillosa, con moita participación e un ambiente cheo de familias. O obxectivo era crear un espazo de encontro para celebrar a nosa cultura e a nosa lingua, e conseguimos que a xente pasara un bo momento”.
Pola súa banda, o presidente da Asociación Cultural Altofalante, David Casais, destacou a boa acollida e o valor simbólico da iniciativa:
“Estamos moi contentos de ver como Ribeira respondeu a esta proposta. Foi un pracer colaborar na organización deste magosto e comprobar que a xente ten ganas de participar, de facer comunidade. A presentación do libro O Magosto de Brais foi moi ben recibida, esgotáronse os exemplares, e demostra que tamén desde a cultura infantil podemos fortalecer o noso idioma e as nosas tradicións”.
As organizacións promotoras agradeceron a colaboración das persoas voluntarias e o comportamento exemplar do público. Ademais, avanzaron que a experiencia se repetirá nos vindeiros anos, coa intención de consolidar o magosto popular como unha das citas máis destacadas do outono ribeirense.
