O Auditorio Municipal de Padrón acolleu este venres o acto de entrega do XXIV Premio de Interpretación Teatral Maruxa Villanueva, un dos recoñecementos máis consolidados das artes escénicas galegas, que nesta edición distinguiu o traballo da actriz arzuá Lidia Veiga pola súa interpretación na obra Iribarne.
O evento, enmarcado no programa Outono Cultural 2025, contou coa presenza do alcalde de Padrón, Anxo Arca, e da concelleira Mariló Saco, ademais dun numeroso público que tributou unha calorosa ovación á galardoada ao remate da representación de Tromsø, da compañía Teatro MoRRAconto, unha das propostas máis destacadas da programación cultural deste ano.
O Premio Maruxa Villanueva, convocado polo Concello de Padrón, busca poñer en valor a traxectoria e o talento das e dos profesionais das artes escénicas galegas. O xurado destacou en Lidia Veiga “a súa calidade e versatilidade interpretativa, así como a capacidade para construír personaxes con autenticidade e profundidade, mantendo a lingua galega como ferramenta de creación artística”.
Durante a entrega do galardón, o alcalde Anxo Arca subliñou a “importante traxectoria” da actriz dentro da escena galega e agradeceu á compañía MoRRAconto “a súa aposta por incorporar música en directo, enriquecendo a experiencia teatral”. O rexedor destacou tamén o orgullo do municipio por manter viva esta distinción:
“En Padrón estamos moi orgullosos do Premio Maruxa Villanueva e da importante oferta cultural que poñemos en marcha cada ano. Desexámoslle a Lidia moitos éxitos no futuro”.
Visiblemente emocionada, Lidia Veiga agradeceu ao Concello de Padrón “por dotar este premio cunha partida económica, que será moi ben investida en proxectos futuros”, e ao xurado “por confiar nunha moza coma min e por destacar o uso do galego como ferramenta interpretativa e artística”.
“Sentinme moi representada coas palabras do xurado dicindo que poño en valor a miña lingua no carácter e profundidade dos meus personaxes. Sen o galego eu non podería darlles autenticidade nin veracidade”, asegurou a actriz, que tamén tivo palabras de agradecemento para a súa familia “por criarme en galego; a miña lingua dáme moito traballo”.
O xurado desta XXIV edición estivo presidido polo alcalde de Padrón, Anxo Arca, e formado por figuras destacadas do ámbito teatral e literario galego: Inma López Silva, Carlos Caetano Biscainho Fernández, Afonso Becerra, Roberto Pascual e María Cruz Taboada.
O premio está dotado con 1.200 euros, un diploma acreditativo e unha figura coa imaxe da actriz padronesa Maruxa Villanueva, símbolo do galardón. “Encántame esta escultura”, declarou Lidia Veiga ao recibir o busto das mans do alcalde.
Con este recoñecemento, o Concello de Padrón reafirma o seu compromiso coa cultura galega e co apoio ao teatro, mantendo viva a memoria e o legado artístico de Maruxa Villanueva, referente das artes escénicas e da defensa da lingua galega.
