Esta fin de semana proseguen en Boiro as proxeccións do Ciclo de Cinema Mestre Mateo. Farano o domingo 2 de novembro ás 19.00 horas no Centro Social de Boiro coa proxección do filme Aurora.
Este documental cóntanos a historia de Aurora e Area, mulleres achegadas de mundos totalmente dispares e con gran diferenza de idade entre elas e que establecen unha forte relación de intimidade, confianza e profundas conversas ligadas á morte, a familia, a guerra e o papel da muller.
O filme está dirixido pola viguesa Area Erina, artista visual de diversas disciplinas como o vídeo, a fotografía, a colaxe ou o celuloide, nas que os seus límites se dilúen pasando do plástico e analóxico ao dixital.
O Ciclo de Cinema Mestre Mateo é un proxecto impulsado pola Academia Galega do Audiovisual coa colaboración da Deputación da Coruña para a proxección nos concellos (como o de Boiro) dos filmes finalistas dos Premios Mestre Mateo.
Mediante esta proposta inclúese o cinema na programación cultural do Concello de Boiro cunha charla coloquio ao remate de cada sesión.
Os filmes que se van proxectar nesta edición do ciclo son +Cuñados, As Neves, Filmei paxaros voando, Xustiza Artificial, Aurora, Honeymoon, Prefiro condenarme e Salvaxe, ademais dunha serie de curtametraxes tamén finalistas.
