O vindeiro sábado, 1 de novembro, celebrarase a XI Carreira Popular Concello de Rianxo, que discorrerá polo centro urbano e a zona portuaria.
Co obxectivo de garantir a seguridade das persoas participantes, o tráfico será cortado temporalmente en distintas rúas do municipio nas franxas horarias indicadas.
Entre as 10:30 e as 13:30 horas, cortarase o tráfico nas rúas comprendidas entre o cruce da Praza Castelao e a rotonda do porto, afectando tamén ao Paseo da Ribeira, rúa Manuel Antonio, e aos paseos interiores dos xardíns e do Centro Histórico.
A partir das 11:45 e ata as 13:30 horas, aproximadamente, o corte de tráfico ampliarase ás rúas de Rinlo, Autores da Rianxeira, zona portuaria, Castillo, Carretera Tanxil (zona baixa) e todo o Centro Histórico.
Así mesmo, entre as 10:00 e as 13:30 horas, os autobuses realizarán a súa parada provisional na rúa Xosé Arcos Moldes (nas inmediacións do Bar Lar e do Colexio Castelao).
O Concello prega a colaboración da veciñanza e recomenda que, no caso de necesitar utilizar o vehículo durante esas horas, se retiren os coches das zonas afectadas con antelación suficiente para evitar esperas e contratempos innecesarios.
