O grupo local de UCIN Boiro emitiu un novo comunicado crítico co Concello porque, segundo denuncian, o Goberno local “mantén nun estado deplorábel e de abandono os parques infantís do municipio, coa herba sen cortar, a maleza invadindo as zonas de xogo, os chans deteriorados e as estruturas cun evidente falta de mantemento”.
Sinalan que o parque infantil de Cures, situado no rural boirense e que a agrupación fotografou estes días, “é só un exemplo máis dunha situación que se repite en practicamente todas as parroquias do concello, con equipamentos abandonados, sucidade e un deterioro progresivo”. E engaden: “Non se pode aceptar que os nenos de Boiro teñan que xogar entre a maleza e o abandono. Os parques deberían ser espazos seguros e coidados”.
Desde o grupo aseguran que “non existe unha política de mantemento real nin unha
planificación seria para garantir o bo estado dos espazos públicos” e din que “o rural forma parte esencial do municipio e merece a mesma atención e coidados por parte do Concello que o casco urbano”.
O grupo esixe ao Concello “unha intervención inmediata e urxente para limpar e rozar todas as zonas infantís do municipio, revisar e reparar os elementos de xogo deteriorados ou inseguros, e implantar un plan periódico de mantemento e supervisión cun calendario público e persoal responsábel que garanta o coidado continuo destes espazos”.
Para os representantes da formación, o abandono dos parques non “é só unha cuestión estética, senón un problema de seguridade, saúde e respecto cara ás familias”.
A agrupación advertiu que continuará percorrendo as parroquias, “recollendo denuncias veciñais e esixindo solucións reais”. E engadiu: “Non imos quedar calados mentres Boiro se deteriora día a día. O abandono non se tapa con escusas: corríxese con traballo, xestión e responsabilidade.”
