A Asociación de Empresarios de Ribeira, a través do seu presidente, Francisco Martínez Gude, vén de achegar un comunicado de urxencia aos Gobernos central e galego no que lles fai saber a profunda situación de incerteza e preocupación na que vive hoxe o sector produtivo ribeirense, respecto futuro que lle agarda unha vez se vaian suavizando as medidas do Decreto de Alarma, e sexa posíbel ir volvendo á normalidade.
No escrito a entidade local lembra que a pandemia chegou “no peor intre”, xa que colleu a todo o sector coa nova tempada en tenda, “con todas as súas facturas pendentes de pagar, con todos os demais gastos que son precisos para manter o negocio e sen vendas dende o pasado 14 de marzo”. Tendo en conta isto, e tendo en conta os problemas que poden vir (por exemplo os descontos sen regulamento) unha vez se permita abrir os portas dos establecementos, a asociación pide a colaboración e vontade “de todos os grupos políticos para axudar ao sector cun regulamento das rebaixas” e, de maneira excepcional, “que as rebaixas este ano comecen en agosto”.
A entidade ribeirense recorda que o “pequeno comercio é xerador de riqueza”, un sector que paga os impostos e que crea emprego, polo que é preciso “que nestes difíciles momentos os partidos políticos nos apoien para poder sobrevivir e seguir dando vida entre todos ás nosas vilas e cidades”.
