A Xunta de Galicia reactivou a Comisión do Mexillón, un órgano clave de coordinación e asesoramento entre a Administración e os profesionais do sector, co obxectivo de afrontar con garantías os retos actuais desta actividade estratéxica para a comunidade.
A conselleira do Mar, Marta Villaverde, presidiu a reunión de reactivación da Comisión, onde destacou a importancia deste espazo común como ferramenta para fortalecer o liderado da actividade extractiva e optimizar a xestión do cultivo. Villaverde subliñou que “para asumir os desafíos actuais é imprescindible actuar desde o consenso e o diálogo”, apuntando que esa cooperación é o mellor método para potenciar un produto recoñecido internacionalmente pola súa excelencia e cunha gran relevancia gastronómica.
Con esta medida, a Xunta reafirma o seu compromiso coa sostibilidade e o desenvolvemento do mexillón galego, impulsando unha estratexia conxunta co sector que se complementará con distintos proxectos xa en marcha da Consellería do Mar.
Entre eles destacan Apromex, destinado á análise das poboacións de semente no intermareal rochoso e á avaliación de novos sistemas de captación; o convenio coa Universidade de Vigo, centrado na identificación e marcaxe selectiva de larvas mediante anticorpos monoclonais; e Capacitamex, que busca mellorar a formación e capacitación das asociacións de produtores.
Con estas accións, a Xunta pretende consolidar a posición de Galicia como referente internacional na produción de mexillón, reforzando a cooperación entre ciencia, administración e sector produtivo para garantir o futuro sostible dun dos piares da acuicultura galega.
