O Concello de Boiro promove unha xornada práctica de compostaxe doméstica destinada a persoas que dispoñen dun composteiro ou que queren iniciarse na compostaxe. A actividade terá lugar os días 24 e 31 de outubro en horario de tarde.
Nesta xornada práctica sobre compostaxe, separación de residuos e aproveitamento vexetal abordaranse catro bloques principais. En primeiro lugar falarase sobre o novo modelo de recollida de residuos, o sistema actual e os cambios que veñen coa separación da materia orgánica; tamén se falará dos hortos urbanos e como estes serven como exemplo de aproveitamento sostíbel.
Levarase a cabo un obradoiro práctico de agricultura ecolóxica e aproveitamento vexetal cunha demostración práctica sobre remedios naturais para combater pragas e técnicas de conservación de produtos vexetais.
A xornada é gratuíta e as prazas son limitadas. A inscrición pode facerse mediante o formulario dispoñible na web municipal ou mediante o enderezo electrónico medioambiente@boiro.org ou o teléfono 981 377 585.
