O arcebispo de Santiago de Compostela, monseñor Francisco José Prieto Fernández, publicou unha carta pastoral con motivo do Domingo Mundial das Misións (Domund), que este ano se celebra baixo o lema “Misioneiros de esperanza entre os pobos”.
No seu escrito, o prelado anima aos fieis a vivir este tempo cun renovado compromiso evanxelizador, sendo “mensaxeiros, construtores e signos da esperanza” nun mundo marcado pola violencia, a inxustiza e o sufrimento.
Monseñor Prieto Fernández lembrou que “o Señor Xesús continúa o seu ministerio de esperanza para a humanidade a través dos seus discípulos”, e subliñou que cada cristián está chamado a seguir as pegadas de Cristo, “a esperanza que non declina nin defrauda”, en referencia ao Xubileo Romano de 2025.
Neste contexto, o arcebispo compostelán apelou á responsabilidade dos crentes de converterse en artesáns de esperanza e sanación, inspirados polo “corazón compasivo do Señor”, para que a Igrexa siga sendo semente de consolo e fraternidade entre os pobos.
