O pesqueiro Noruego quedou completamente calcinado tras un incendio rexistrado este xoves en augas de Angola. O barco era ata o pasado mes de agosto propiedade dunha coñecida familia de armadores de Ribeira.
O lume desatouse pasado o mediodía, cando a tripulación detectou unhas chamas que avanzaban con rapidez desde a popa cara á ponte. Por fortuna, todos os tripulantes —entre eles catro galegos— puideron ser rescatados por un caiuco que se atopaba nas inmediacións. Algúns dos mariñeiros galegos forman parte da empresa propietaria do buque.
No momento do sinistro, dous dos tripulantes atopábanse na ponte de mando e os outros dous na sala de máquinas. As causas do incendio aínda non puideron determinarse.
Con casco de aceiro e 28 metros de eslora, o Noruegués fora matriculado en 2005. Durante anos dedicouse á pesca de peixe espada, formando parte da histórica frota de Ribeira especializada nesta modalidade, da que apenas quedan xa algúns exemplares.
