O vindeiro 24 de outubro a agrupación Óscar Cobos Cia. de Danza estará en Rianxo, no Auditorio Municipal, para presentar ante o público local o espectáculo Nove espellos, a proposta máis recente do grupo: unha iniciativa escénica que nos mergulla nunha atmosfera onírica deixando una pregunta no ar: onde imos cando durmimos? A cita será o 24 de outubro ás 20.00 horas. Trátase dunha actividade que conta co apoio da Xunta de Galicia a través da Axencia Turismo de Galicia.
Nove espellos é, en palabras da compañía, “unha viaxe polo multiverso do eu-non-consciente, un espazo onde o todo e a nada son o mesmo, onde se recrean medos, desexos, fracasos, ausencias, acertos, ledicias e tristezas, onde a música que todos levamos dentro pode chegar a converterse nun ruído insoportable, onde un sorriso pode converterse nun aceno irrecoñecíbel, onde as liñas se deforman creando formas que só son posíbeis nun espazo-tempo ilimitado, onde un berro imposíbel deixa que o eu máis esencial se faga presente, despoxado de calquera imposición do mundo da razón. Nove espellos é a liberdade absoluta que cada un de nos creamos nun mundo feito a nosa medida, onde procesamos as emocións e os recordos que experimentamos no universo do eu-consciente”.
Trátase dunha proposta pensada para tres intérpretes que interactúan entre si utilizando para isto diferentes linguaxes vencelladas ás artes do movemento, dende a danza popular tradicional galega ata a danza de contacto, pasando pola danza contemporánea e a danza clásica entre outras.
