O proxecto ULA Libraría Social que impulsa Maitane Vicente na Serra de Outes, na rúa da Capela, vai acoller esta semana dunhas importantes actividades literarias: por unha banda a presentación de A fraga dos teixos de Xosé Salvadores, e pola outra unha sesión do club de lectura de ULA cunha cita arredor de O curioso incidente do can á media noite, de Mark Harddon.
17OUT. Presentación da man de Xosé Salvadores do seu libro A fraga dos teixos un traballo no que mostra como restaurou 14 ferrados de monte que ata entón, só habitaban baleiro e eucaliptos. Editada por Temos Galiza, trátase dunha crónica persoal e apaixonada de Xosé Salvadores de un ano de traballo para restaurar a biodiversidade en 14 ferrados de monte inzados de eucaliptos, nun caderno de campo que ben pode ser lido como unha amena guía de fauna e flora da Galiza e, especificamente, da Mariña, “mais tamén como un convite para actuarmos en defensa da natureza e do noso medio tan agredido, mesmo como un exemplo do que pode ser feito con vontade individual e, sobre todo, con planificación institucional e esforzo colectivo”.
18OUT. Club de lectura de persoas adultas, onde conversaremos sobre a mítica e marabillosa novela de Mark Haddon O curioso incidente do can á media noite. Sinopse: Christopher Boone ten quince anos, é un experto en ciencias e matemáticas, coñece as capitais de todos os países do mundo e os números primos ata o 7.507, pero ten dificultades para relacionarse con outras persoas. Unha noite encontra a Wellington, o can da veciña, atravesado por unha forca de xardín, polo que decide comezar unha investigación para descubrir o asasino. Mentres leva a cabo as súas pescudas, que converte nunha novela policial, cuestionará a lóxica do mundo que o rodea e desvelará certos misterios que van alterar a súa vida metódica e ordenada.
