O Bloque Nacionalista Galego celebrou este 12 de outubro en Nebra unha homenaxe ás Mártires asasinadas pola Garda Civil en 1916, cando cinco labregas —catro mulleres e un home— foron abatidas e máis de trinta persoas resultaron feridas por defender os seus dereitos fronte ao pagamento inxusto de impostos ao Estado español. A vicepresidenta segunda do Parlamento e deputada do BNG, Montse Prado, salientou que aquel episodio é “un símbolo da resistencia galega fronte ao centralismo e a inxustiza” e lembrou que “a memoria das que nos precederon é semente de futuro”.
Durante a súa intervención, Prado denunciou a “dependencia política e económica de Galiza” e o “espolio continuado” dos seus recursos por parte do Estado e das multinacionais.
“Madrid decide canto e cando nos entrega o diñeiro que é noso, mentres se nos espolian miles de millóns cada ano e se destrúe o territorio con proxectos como Altri ou o espolio eólico”, advertiu.
A deputada subliñou que “hoxe, igual que en 1916, hai unha cidadanía viva, activa e rebelde que non cala ante o espolio, nin ante o deterioro da sanidade, do ensino ou dos servizos públicos”.
Para o BNG, actos como o de Nebra son “imprescindíbeis para manter viva a memoria colectiva e reivindicar o dereito de Galiza a decidir libremente o seu futuro”.
“O Bloque mira cara o futuro, mais non desde a desmemoria, senón co orgullo do que somos”, concluíu Prado, quen fixo un chamamento a “seguir construíndo un país soberano, dono dos seus recursos e capaz de garantir prosperidade e benestar ao seu pobo”.
