A ANPA Santa Uxía do CEIP O Grupo de Ribeira remitiu un escrito ao conselleiro de Educación, Ciencia, Universidades e Formación Profesional da Xunta de Galicia, Román Rodríguez González, para expresar o seu profundo malestar pola falta de nomeamento dun titor ou titora para o grupo de 3ºB de Educación Primaria durante o curso 2025-2026.
No documento, asinado polo presidente da asociación, Unai González Suárez, a entidade denuncia a situación de “desamparo e caos organizativo” que está a vivir o centro desde o inicio do curso, ao non cubrirse a vacante correspondente a esa unidade, composta por 23 alumnos de 7 e 8 anos. Segundo explica a ANPA, a Consellería comunicou que o grupo sería co-titorizado por outro mestre, cubríndose as clases “coas horas de garda do resto do profesorado”, unha medida que cualifican de “esperpéntica e absurda” por afectar á calidade educativa de todo o colexio.
A asociación lembra que esta praza debería terse cuberto automaticamente coas listas de substitución, tal e como se fai noutros casos habituais como baixas médicas ou comisións de servizo. Tamén lamenta que, malia enviar escritos á inspección educativa, á dirección provincial e á propia Consellería, non recibiron resposta oficial, coñecendo as decisións “unicamente a través da prensa ou da dirección do centro”.
Mobilizacións e apoio social
A comunidade educativa do CEIP O Grupo leva máis de cinco semanas de protestas mediante concentracións, caceroladas, folgas e asembleas, contando cun seguimento do 88% das familias e o 75% do profesorado. Ademais, a Corporación Municipal de Ribeira aprobou por unanimidade unha moción cidadá en apoio á demanda das familias, e a ANPA reuniu máis de 3.300 sinaturas en menos dun mes.
A carta tamén recorda que a situación derivou na dimisión en bloque da equipa directiva, non aceptada pola inspección nin pola dirección provincial, e que o actual catálogo de persoal do centro non se corresponde coa realidade, xa que contempla doce unidades de Primaria cando actualmente hai trece.
Petición directa ao conselleiro
A ANPA solicita ao conselleiro que nomee de forma inmediata un titor ou titora a tempo completo para o curso 3ºB, e propón unha reunión urxente para abordar tamén outras cuestións pendentes, como a falta de profesorado de apoio e NEAE, a necesidade de coidadores, así como obras pendentes no centro (como a cuberta de Infantil, o pintado exterior, o arranxo do pavillón ou a posta en funcionamento do ascensor instalado no edificio anexo).
O presidente da entidade, Unai González, remata o escrito apelando á comprensión e ao diálogo, pero tamén á firmeza na defensa dos dereitos do alumnado:
“Non pensamos deixar de reivindicar os nosos dereitos, porque os nenos do Grupo teñen dereitos e o Grupo quere profes”.
