Ribeira impulsa o comercio local cunha campaña que tamén promove a igualdade
A concelleira de Comercio, Genoveva Betanzos, e a concelleira de Igualdade, Cruz Rivadulla, presentaron unha nova campaña de dinamización comercial promovida pola Concellería de Comercio do Concello de Ribeira. A iniciativa ten como obxectivo impulsar as compras no comercio de proximidade ao tempo que conciencia á cidadanía sobre a loita contra a violencia machista.
Durante a presentación, Genoveva Betanzos destacou a importancia de apoiar o comercio local, especialmente nestes meses previos ao Nadal:
“Precisamente nestes meses de outono é cando temos que apoiar máis ao noso comercio para intentar xerar unhas dinámicas que fagan de ponte cara ás compras do Nadal”, sinalou.
Como parte da campaña, o Concello de Ribeira pon á disposición da veciñanza 1.000 paraugas de balde, adquiridos no propio comercio local. As persoas interesadas poderán recoller un máximo de dúas unidades por persoa, ata esgotar existencias.
A distribución dos paraugas comezará o luns 20 de outubro, en horario de 10:00 a 14:00 horas, no Centro Cultural Lustres Rivas (2º andar, fronte á biblioteca). A concelleira salientou que esta acción é gratuita e pretende incentivar o consumo responsable e solidario, reforzando o compromiso municipal co tecido económico e coa igualdade de xénero.
