Peñas Boiro AC organiza o vindeiro sábado 8 de novembro unha cea solidaria en beneficio de ASANOG. A concelleira, María Outeiral, participou este mércores 8 de outubro na presentación xunto con David Laíño, presidente de Peñas Boiro AC; e Yenny Rodríguez, coordinadora de ASANOG.
A cea terá lugar no restaurante Chicolino ás 22.00 horas e contará con animación musical e sorpresas. O prezo da cea é de 50 euros e doarase un 10% a ASANOG ademais de todo o recadado coas rifas que se venderán durante a cea para o sorteo dunha viaxe. “A andaina que fixemos para recadar fondos foi un éxito e queremos seguir facendo actividades nesta liña para recadar fondos para axudar a entidades e asociacións con fins sociais”, afirmou David Laíño.
A Asociación de Cáncer Infantil e Xuvenil de Galicia ten como finalidade prestar apoio e asistencia ás familias de nenos e nenas oncolóxicos.
“Estamos moi agradecidos co gran apoio que recibimos en Boiro coa colaboración en actividades coma esta”, recoñeceu Yenny Rodríguez.
Pola súa parte a concelleira María Outeiral agradeceu “o compromiso de asociacións culturais como Peñas Boiro AC con entidades sociais como ASANOG que leva a cabo un gran traballo cos nenos e nenas e as súas familias”.
