A medida, da que se poden beneficiar 600 barcos que faenan no caladoiro nacional, facilita o cumprimento da nova normativa comunitaria de control pesqueiro. As axudas están financiadas polo FEMPA e poden solicitarse ata o día 1 de decembro na páxina web do Ministerio de Agricultura e Pesca.
O BOE do 6 de outubro publicou as bases reguladoras e a convocatoria 2025 das axudas para a adquisición e instalación de equipos de localización (caixas azuis) en buques pesqueiros de 12 a 15 metros de eslora.
Estas axudas están financiadas polo Fondo Europeo Marítimo, de Pesca e de Acuicultura (FEMPA).
Ata o de agora só os barcos de máis de 15 metros de eslora estaban obrigados a contar con este dispositivo, pero coa modificación do regulamento de control, amplíase a esixencia aos buques de 12 metros ou máis.
O Ministerio ofrece esta liña de subvencións para facilitar a adaptación especialmente a micropemes, que son a maioría neste segmento da frota. As axudas cubrirán os custes de compra, instalación e posta en marcha dos citados equipos de localización. Estímase en 600 o número de embarcacións que operan no caladoiro nacional que poderán acollerse a esta medida.
