Galicia manterase baixo a influencia das altas presións con ceos despexados e temperaturas suaves
Galicia quedará novamente baixo a influencia das altas presións durante esta xornada do domingo 5, San Froilán,, o que favorecerá un tempo estable e principalmente despexado. Agárdanse ceos pouco nubrados ou despexados en xeral, aínda que poderán rexistrarse intervalos de nubes baixas a primeiras horas na metade leste e nubes de estancamento na Mariña lucense, onde non se descarta algunha chuvia feble ao comezo do día.
As temperaturas mínimas experimentarán un lixeiro descenso, mentres que as máximas subirán de forma moderada, deixando unha xornada agradable e soleada na maior parte do país ( 21 a 25 graos).
O vento soprará do nordés, moderado en xeral, con intervalos fortes no litoral da provincia da Coruña durante a tarde.
O noso mar: Vento do nordés á mañá e á noite e do norte á tarde, forza 3 a 5. Marusía. Visibilidade boa. Mar de fondo do noroeste, con ondas de 3 a 3.5 metros á mañá, 2.5 a 3.5 metros á tarde e 2.5 a 3 metros á noite.
