O tempo deste sábado 4, San Francisco de Asís, estará marcado polo paso dunha fronte fría pouco activa que atravesará o territorio nas horas centrais da xornada. A mañá comezará con ceos cubertos e presenza de nubes baixas, mentres que ao longo do día se rexistrarán precipitacións febles e dispersas, que tenderán a desaparecer ao final da tarde.
As temperaturas mínimas manteranse estables, pero as máximas experimentarán un moderado descenso respecto a xornadas anteriores( 19-20 graos). Polo que respecta ao vento, comezará soprando frouxo do sur e, tras o paso da fronte, rolará a nordés con intensidade moderada durante a tarde. O domingo 5, teremos ceos pouco nubrados ou despexados en xeral.
O noso mar: Vento do sur á mañá e do norte á tarde e á noite, forza 2 a 4 á mañá e á tarde e 3 a 5 á noite. Mar ovellado á mañá, marusía á tarde e forte marusía á noite. Visibilidade regular á mañá e á tarde e boa á noite. Mar de fondo do noroeste, con ondas de 1 a 2 metros á mañá e 2 a 3 metros á tarde e á noite.
