A Mostra de Teatro de Ribeira 2025 botou a andar onte, venres 26 de setembro, no Auditorio Municipal coa estrea do espectáculo “Heroes en decembro”, dirixido por Sara Rey a partir dun texto de Eva Mir. A produción, froito da colaboración das compañías Vórtice Escénico, Ancoraxe e o Centro Dramático Galego (CDG) xunto ao Concello de Ribeira, pon o broche á primeira Residencia Teatral Artística de Ribeira, desenvolvida ao longo da pasada semana no propio auditorio.
O inicio da mostra contou cunha moi boa acollida: 434 persoas entre abonados e público con entrada asistiron á función. Antes da representación, tomaron a palabra o alcalde, a concelleira de Cultura e o xestor cultural municipal, quen deron a benvida ás compañías e ao público, agradeceron a súa participación e desexaron unha boa edición. Ademais, anunciaron que este ano se pon en marcha, por primeira vez, un cuestionario de valoración da mostra para recoller a opinión dos asistentes.
Na estrea estiveron presentes tamén o director do CDG, Fran Núñez, así como a xefa de estudos e a secretaria da ESAD de Galicia, acompañando ás compañías nesta apertura da programación.
