A Xunta de Galicia tende a man ás confrarías que están a atopar dificultades para obter o certificado sanitario esixido polo Instituto Social da Mariña (ISM) para poder despachar e enrolarse nunha embarcación.
Neste contexto, a conselleira do Mar, Marta Villaverde, clausurou na Pobra do Caramiñal un dos cursos promovidos polo seu departamento que permiten a obtención deste permiso, dando así resposta á problemática xerada pola falta de prazas libres nos centros habilitados polo organismo estatal, que non dispoñen de vacantes ata dentro de varios meses.
O curso, cunha duración de 22 horas e validez de cinco anos, permite obter este certificado de especialidade. Grazas á colaboración do Goberno galego, cun custo cero para os participantes, xa se impartiron 13 cursos deste tipo no que vai de ano, nos que se capacitaron 197 traballadores do mar.
A Consellería do Mar promove esta iniciativa a pesar de non ser da súa competencia, co obxectivo de contribuír á profesionalización dos traballadores e facilitar o embarque dos tripulantes. Segundo explicou Villaverde, en 2024 a Xunta investirá 12,3 millóns de euros para reforzar a rede de centros galegos e profesionalizar o sector, convertendo Galicia nunha referencia estatal nesta materia.
Esta estratexia busca garantir o relevo xeracional, atraer novos profesionais e asegurar a competitividade e sostibilidade do sector marítimo-pesqueiro galego.
