Un home de 78 anos perdeu a vida este martes tras verse implicado nun accidente de tráfico mentres circulaba en bicicleta pola avenida Mestra Victoria Míguez, nas inmediacións do Campus Sur universitario de Santiago de Compostela.
Segundo informou o 112 Galicia, o sinistro produciuse ao redor das 12:15 horas, momento no que o Servizo de Urxencias Sanitarias de Galicia-061 deu aviso da gravidade das lesións sufridas polo ciclista. A pesar da rápida intervención dos servizos de emerxencias, non foi posible salvarlle a vida.
Tras coñecer o suceso, a central de emerxencias mobilizou aos Bombeiros de Santiago, á Policía Local e a efectivos de Protección Civil, que se desprazaron ata o lugar do accidente.
Fontes municipais sinalaron que, polo momento, se descoñecen as circunstancias exactas da colisión entre o ciclista e o vehículo implicado. O home falecido circulaba acompañado por outro ciclista, que resultou ileso.
A Policía Local abriu unha investigación para esclarecer os feitos.
