Ribeira acolleu este luns 22 de setembro a presentación da terceira edición das Xornadas Muller e Saúde. Á convocatoria acudiron a concelleira de Educación e Formación, Cruz Rivadulla xunto á asesora legal do CIM (centro de Información á Muller), Dolores Crujeiras. A concelleira informou que o programa está artellado pola Escola Galega de Saúde, “e dende o CIM, con esta edición, levamos participando tres anos no programa que está sempre vinculado á muller e a súa saúde”.
O programa, explicou, vaise desenvolver durante todos os venres do mes de outubro na Casa da Xuventude e constará de catro sesións; a primeira será a maternidade –o embarazo e parto–, o segunda será o puerperio –coidados para a recuperación física e emocional da nai–, a terceira será a lactancia materna -a lactancia materna e os coidados do bebé–, a cuarta e última será depresión posparto –identificar, prever e tratar a depresión posparto.
Rivadulla salientou que son temas que debemos tratar e que a través desta iniciativa as nais poderán despexar dúbidas e dificultades. Engadiu que ás sesións tamén poderán asistir homes que vaian ser pais.
Crujeiras valorou que o obxectivo deste programa é “promover a saúde das mulleres e aumentar a súa calidade de vida”, para iso o programa facilitará ferramentas para que as mulleres se apoderen e sexan suxeitos activos respecto da súa propia saúde, tamén para aumentar os vínculos sociais das mulleres participantes, potenciando a súa autoestima e seguridade persoal e finalmente contribuír ao coñecemento e aproveitamento dos activos existentes para a saúde.
Lugar de celebración: Casa da Xuventude, avenida da Constitución, nº 3
Ribeira
Datas
10 de outubro do 2025- 1a Sesión de 17.00 – 20.00 horas
17 de outubro do 2025- 2a Sesión de 17.00 – 20.00 horas24 de outubro do 2025- 3a Sesión de 17.00 – 20.00 horas
31 de outubro do 2025- 4a Sesión de 17.00 – 20.00 horas
Programa
1ª Sesión- A Maternidade
O embarazo e o parto: cambio físicos e emocionais durante o embarazo; sangrados e ameazas de aborto, que debe saberse, fases do parto, técnicas de control da dor, desmontar tabús.
2ª Sesión-O Puerperio
O puerperio: coidados para a recuperación física e emocional da nai, recuperación tras unha cesárea, coidados da cicatriz, técnicas para calmar ao bebé e que mellore o sono de ambos.
3ª Sesión-Lactancia Materna
A lactancia materna e os coidados do recen nado: a importancia da lactancia materna para a saúde e
o benestar do bebé; técnicas para aleitar de forma efectiva, alimentación, hixiene e manexo do bebé.
Profesorado: Sonia Gonzalez Castroagudin, matrona da Área Sanitaria de Santiago
4ª Sesión-Depresión Postparto
A chamada depresión posparto: identificar, prever e tratar a depresión posparto, coñecer os síntomas, factores de risco e tratamentos, a importancia do apoio social e atención integral ás nais. A influencia dos patróns culturais Profesorado:Raquel Gonzalez Castroagudin- Facultativo especialista da Área Sanitaria de Santiago.
As inscricións poden facerse en liña, a través da conta de correo ribeiradinonvx@ribeira.gal e do teléfono 679 306 188.
