As entidades da nosa comarca que xa tiñan ampla presenza nas redes están a ter, nestes tempos de COVID-19, unha especial actividade dixital. Do que se trata é de que o traballo social, formativo, divulgativo e dinamizador non se interrompa. Dende a Asociación Ambar de Ribeira e Pobra, centrada na inclusión e dignificación dos colectivos con diversidades funcionais, os días da semana seguen a ser intensas xornadas de traballo creativo, coa diferenza de que se convocan e materialízanse nos móbiles, nas tabletas e nos computadores. Ao fío disto, a semana pasada rematou con rutinas de adestramento deportivo, de estimulación (fabricando a nosa propia plastilina), de ocio dixital (informática básica) e de cociña (pizzas caseiras).
E xa postos nesta semana, as actividades seguen sen interrupción con retos motrices deportivos, elaboración de cartas de presentación con vistas á inclusión laboral, estimulación sensorial e obradoiros de habilidades con diferentes retos e enigmas a resolver.
Todas estas accións estanse a canalizar a través do servizo de atención diúrna en formato dixital impulsado por Ambar co inicio da crise sanitaria. Trátase dunha iniciativa destinada a “apoiar ás persoas con diversidades que asisten aos servizos de Centro de Día e Centro Ocupacional” (e que na actualidade fican confinadas por mor da crise sanitaria).
