A segunda xornada da Regata da Muller, que se celebra estes días en augas da Ría de Arousa baixo a organización do Centro Galego de Vela, deixou unhas condicións case perfectas para a navegación, cun total de sete mangas validadas polo Comité e a entrada en acción de dous descartes por equipo aos peores resultados parciais.
Co novo escenario competitivo, o equipo de Baleares tomou o relevo de Canarias no máis alto da clasificación. As regatistas do Real Club Náutico de Palma, lideradas por Gabriela Morell, situáronse líderes con 19 puntos grazas á súa regularidade e dous primeiros postos.
Moi preto, a só tres puntos, están as galegas do Real Club Náutico de Vigo, que brillaron nesta segunda xornada da man da patrona Paula Ríos, logrando tamén dous primeiros parciais e colocándose na prata provisional con 22,25 puntos. O bronce é para Cataluña, co equipo de El Balís, patroneado por Jana Rahola, que baixou un chanzo na táboa aínda que se mantén a tan só 0,75 puntos das galegas.
A xornada comezou con aprazamento pola inestabilidade meteorolóxica, pero finalmente o vento do suroeste, entre 260 e 270 graos e con intensidade de 9 a 12 nós, permitiu competir no mesmo campo de regatas que o venres, entre Illa, Malveiras e Cortegada.
Este podio tan axustado evidencia a igualdade e o nivel que se está vivindo en Vilagarcía, nunha edición promovida polas Reais Federacións Española e Galega de Vela, co patrocinio da Secretaría Xeral para o Deporte da Xunta de Galicia, a Deputación de Pontevedra e Ence – Plan Social.
Todo quedará decidido este domingo, na terceira e última xornada, coa clasificación moi aberta e as medallas en xogo entre Baleares, Galicia e Cataluña.
