Este domingo 21 de setembro será unha das xornadas máis destacadas das festas do Nazareno. A música marcará o inicio da mañá coa entrada na vila, ás 10.00 horas, da Banda de Música Escola Naval Militar de Marín, a Banda de Música Ateneo Musical da Pobra, a Banda de Gaitas Buxaina de Taragoña e os grupos de gaitas Xiada e O Son do Pote. Media hora máis tarde, ás 10.30 horas, celebrarase a solemne e tradicional Procesión Votiva das Mortallas.
A actividade continuará ás 13.00 horas cos concertos programados no xardín, na praza da Maura e en García Martí. Xa pola tarde, ás 18.30 horas, o Grupo de Gaitas O Son do Pote animará as rúas cun pasacalles. A Banda de Música Ateneo Musical da Pobra ofrecerá un concerto no xardín ás 20.00 horas e, ás 21.00 horas, a Banda de Gaitas San Xoán de Paramos actuará na praza Alcalde Segundo Durán. A orquestra Panorama será a encargada de pechar a xornada cun espectáculo musical previsto para as 23.00 horas.
Luns de clausura con música, cor e lume
O programa festivo concluirá o luns 22. A partir das 10.30 horas haberá pasacalles coa Banda de Música de Moimenta, a Banda de Gaitas Os Chaneiros e a Banda de Gaitas Xiada e O Pote. Ás 12.00 horas os máis pequenos poderán desfrutar dunha festa infantil e, xa pola tarde, ás 16.30 horas, A Covecha encherase de cor cunha festa holi.
A música retomará o protagonismo ás 19.00 horas cun concerto da Banda de Música de Moimenta, mentres que a orquestra Combo Dominicano será a encargada da actuación nocturna, a partir das 21.00 horas.
O broche final das festas do Nazareno chegará pasada a medianoite: ás 00.15 horas terá lugar un gran espectáculo de drons sincronizado con fogos artificiais, poñendo o punto e final á programación deste ano.
