O Concello de Rianxo comunicou a súa decisión de adherirse á Federación Galega de Municipios e Provincias (FEGAMP) e á súa participación no acto público convocado para este venres 19 de setembro, como símbolo de condena enérxica e repulsa a toda forma de antisemitismo e islamofobia, reafirmando así o seu compromiso co respecto a todas as comunidades, culturas e relixións.
A Comisión Executiva da FEGAMP, reunida o pasado 16 de setembro en Santiago de Compostela, aprobou un manifesto no que se denuncia “a grave situación humanitaria que se está vivindo en Gaza”. O texto recolle datos sobre milleiros de vítimas mortais, persoas feridas e desprazadas, así como a destrución sistemática de infraestruturas civís e o bloqueo á entrada de axuda humanitaria.
Ás 19:00 horas de mañá, venres 19 de setembro, terá lugar unha concentración e lectura do manifesto na Praza de Rafael Dieste.
En Noia
O Concello de Noia tamén se suma á convocatoria da FEGAMP e fai un chamamento á cidadanía para que participe nun minuto de silencio ás 12:00 horas, este venres 20 na porta da Casa do Concello, en solidariedade co pobo palestino. “Apoiamos as reclamacións dos concellos galegos e esiximos que cese o xenocidio que o goberno israelí está a cometer contra a poboación palestina en Gaza”, sinalan dende o Concello de Noia.
En Muros
O Concello de Muros convoca este venres 19 de setembro un minuto de silencio ás 12:00 horas diante da Casa do Concello para condenar o xenocidio do pobo palestino. Muros únese desta maneira á iniciativa da FEGAMP nos concellos galegos, convocando un acto público en solidariedade co pobo palestino e condenando os ataques perpetrados contra a súa poboación.
Na Pobra
O Concello da Pobra do Caramiñal súmase á convocatoria da FEGAMP e realizará este venres 19 de setembro unha concentración para condenar o xenocidio que sofre o pobo palestino. Será ás 12.00 diante da Casa do Concello. Gardarase un minuto de silencio en sinal de repulsa por estes feitos.
