Galicia rexistrou no verán climatolóxico de 2025 (xuño, xullo e agosto) o período máis cálido da serie histórica, iniciada en 1961, cunha temperatura media de 21,1 graos, o que supón dous graos máis do habitual, segundo o informe elaborado por MeteoGalicia.
O estudo conclúe que, tomando como referencia as temperaturas mínimas e máximas, este verán foi “extremadamente cálido”, cunha anomalía media de 2,3 graos máis nas mínimas e 1,7 graos máis nas máximas.
O mes de xuño destacou como o máis cálido da serie histórica, cunha media de 20,5 graos (+2,8), e con récords tanto nas mínimas (+2,6) como nas máximas (+3). Pola súa parte, xullo e agosto foron considerados “moi cálidos”, con anomalías superiores ao grao respecto ao normal. Agosto foi ademais o segundo máis cálido rexistrado, marcado por un episodio prolongado de calor entre os días 2 e 17, con temperaturas máximas 2,5 graos por riba da media.
No apartado de precipitacións, Galicia viviu un verán moi seco, con só 51 litros por metro cadrado de media, un 62 % menos do habitual. Para atopar un verán con menos choivas hai que remontarse a 1981. Xuño acumulou 18 litros/m² (-68 %), xullo 15 litros/m² (-55 %) e agosto 18 litros/m² (-58 %).
Con estes datos, o verán de 2025 confirma a tendencia de aumentos térmicos e déficit hídrico, que segundo MeteoGalicia reforzan a alerta sobre o impacto do cambio climático no territorio galego.
