Neste mes de setembro comezan novos proxectos no Concello de Muros, trátase de cinco obras que suporán un investimento de máis de 1,1 millóns de euros para mellorar os servizos e as infraestruturas públicas da vila. Será o vindeiro luns, 15 de setembro, cando comezarán os traballos de recuperación da antiga escola unitaria da parroquia de Serres para o proxecto da Aula Sostíbel dos Outeiriños. “O inmóbel acollerá un espazo de traballo colaborativo entre distintas entidades, impulsando un programa de educación e sensibilización medio ambiental e do sector pesqueiro”, explica a alcaldesa de Muros, María Lago.
Dicir que o proxecto ten un orzamento de arredor de 375.000 euros e as obras rematarán no ano 2026. O Concello de Muros achegará 174.837, 69 euros e recibirá unha axuda do GALP de 198.878,91 euros. “A rehabilitación da antiga escola unitaria servirá para dinamizar o tecido asociativo da parroquia de Serres e as actividades da veciñanza”, engade a alcaldesa. “Outras tres obras serán para continuar co plan de mellora do saneamento no concello, levando o servizo a zonas que carecían del e renovando a rede existente”, asegura Laura Rivadeneira, concelleira de Obras.
Asemade, este mes de setembro darán comezo os traballos de saneamento na marxe dereita de Serres (170.609,14 euros); o saneamento de Ribeira do Maio (250.000 euros) e unha actuación para o saneamento e a renovación do pavimento da rúa Real (238.300 euros).
Dende o goberno local, a alcaldesa de Muros, María Lago, fixou entre as súas principais prioridades o saneamento no concello,vital para o marisqueo en Muros.
Engadir que tamén está previsto o inicio para este mes de setembro das obras de mellora dos camiños de Somorto, en Abelleira, e Cabanas, en Tal, (73.610 euros), que servirán para potenciar a seguridade viaria e a accesibilidade.
