Porto do Son celebrou a súa Festa do Carme cunha emotiva procesión marítima
Porto do Son volveu cumprir coa tradición e celebrou este 8 de setembro a súa particular homenaxe á patroa do mar, distinta á maioría de vilas galegas que a conmemoran o 16 de xullo.
A xornada estivo marcada pola emotividade da procesión marítima, na que a imaxe do Carme baixou desde a atalaia ata o porto para participar nun acto de ofrenda floral en lembranza das persoas falecidas no mar.
Tras a cerimonia relixiosa, deron comezo tres días de festa con música, verbena e actividades populares, que poñen o broche final ao verán nesta vila mariñeira e turística do Barbanza.
O martes 9 estará adicado á Virxe do Loreto. Arrincará coas dianas e alboradas de Canlebó. Haberá misas na Capela de Loreto ás 9h, ás 10, ás 11, ás 12, ás 18 e ás 19. Ás 13.00 horas celebrarase unha misa solemne acompañada pola Banda de Música de Caamaño. Despois haberá unha sardiñada no campamento de Loreto amenizada por Paco de Leña. Pola noite actuarán Kubo e a Discomóbil Chocolate.
O mércores 10, adicado a San Roque, arrincará novamente con Canlebó. Ás 12h celebrarase unha misa solemne na Capela da Atalaia e logo haberá unha procesión coa Banda de Música de Caamaño. Pola noite, a partir das 22h, volverá a verbena con Los Satélites e Finisterre.
As festas rematarán o xoves 11, o día da Caridade. Logo das dianas e alboradas co grupo de gaitas Canlebó haberá misa solemne na igrexa parroquial e posterior procesión acompañada pola Banda de Música de Caamaño. Ás 17.00 horas haberá actividades para a rapazada no xardín do porto: os inchábeis de Tikolandia e unha festa da escuma. Pola noite será a quenda da verbena coas orquestas París de Noia e Triunfo, máis a cabina de Discomóbil Chocolate. A partir das 0.00 horas tiraranse os fotos de artificio e a continuación haberá ruada e festa da auga coa Charanga Os Celtas.
