A ANPA Santa Uxía do CEIP O Grupo de Ribeira compartiu un comunicado no que reflicte o seu malestar e indignación tras ter coñecemento o pasado venres, de que este curso o dito centro educativo non vai poder contar con titor/a de Educación Primaria, achegando como solución, denuncian, “que o curso afectado, neste caso 3ºB, con 23 alumnos de 7 e 8 anos, sexa co-titorizado pola mestra doutro curso e que as clases sexan impartidas polo conxunto do profesorado do colexio (primaria, especialistas, NEAE) coas horas que teñen dispoñibles de gardas e titorías”. A ANPA critica que esta decisión da Consellería de Educación “derivaría nunha situación esperpéntica onde cada día e cada hora este grupo de alumnos tería un mestre distinto ensinándolle as diferentes materias”.
E engaden: “É fundamental na educación que exista un titor/a de referencia para cada curso, onde coñeza ao seu alumnado e poida programar en función das súas necesidades e características, así como impartir as áreas instrumentais básicas (linguas, matemáticas) e as ciencias e non que estas sexan impartidas por distintas persoas cada día e hora”.
Para o colectivo de nais e pais, a dita solución “merma claramente a calidade do ensino e suporía un grave problema no colexio, non só para o curso afectado, senón para o conxunto do alumnado pois o profesorado perdería as horas de garda que dedica a cubrir vacantes puntuais do día a día, titorías, apoios ou outras tarefas propias do ensino”.
Respecto das esixencias concretas á Consellería, reclaman ao xefe territorial de educación da Coruña e á propia Inspectora “solución inmediata a este problema así como unha reunión para tratar outros temas que afectan ao colexio”.
Como medidas de presión van organizar axiña unha concentración da comunidade educativa mañá luns, ás 11:30 h na porta do CEIP O Grupo, concentración que está previsto que se celebre durante o recreo e “á que convocamos a todas as familias, avós, pais e nais, familiares e ao conxunto da cidadanía ribeirense para apoiarnos”, sinalan, estendendo o convite ao resto das anpas do municipio e á Corporación municipal “porque entendemos que o futuro dos nosos fillos é o suficientemente importante para que todos sen distinción apoien esta reclamación”.
