O conselleiro de Sanidade, Antonio Gómez Caamaño, salientou este venres 5 de setembro que “o compromiso da Xunta coa sanidade pública de Porto do Son”. Comentou que este compromiso materialízase nunha nova reforma do Centro de Saúde mentres se impulsa o novo equipamento”.
O titular da carteira sanitaria da Xunta visitou a vila do Son e asinou co rexedor municipal, Luis Oujo, un convenio de colaboración, financiado ao 50 % entre a Xunta e o Concello, para acometer unha nova reforma do Centro de Saúde, cun investimento total de 43.000 euros.
Esta nova obra é continuación da realizada no ano 2024, mediante a que se reformou a cuberta do centro, e na que se investiran preto de 12.000 euros, lembrou.
No acto, no que estivo acompañado polo xerente da área sanitaria de Santiago de Compostela e Barbanza, Ángel Facio, o conselleiro explicou que as melloras no centro “aplicaranse sobre a fachada traseira, que se limpará antes de proceder á súa impermeabilización co propósito de reforzar a súa protección fronte á humidade”.
Polo que atinxe á cuberta, realizarase unha limpeza e saneamento completos, o que implica o lavado da parte traseira do tellado e a reposición das tellas rotas. Na zona dianteira, levantaranse as tellas para eliminar musgo e herbas daniñas. Ademais, impermeabilizaranse as chemineas. Tamén se rematará a cubrición da entrada principal.
O conselleiro salientou que o obxectivo destas melloras é “ofrecerlles aos profesionais e usuarios da sanidade pública o espazo máis axeitado para a prestación da asistencia á cidadanía”.
Segundo sinalou, estas obras enmárcanse na liña de traballo da Xunta de reforzar a atención primaria en toda a comunidade, combinando tarefas de mantemento inmediato sobre as infraestruturas existentes e a planificación de novos proxectos.
Na súa intervención, Gómez Caamaño avanzou que a Xunta e o Concello están a traballar nun proxecto moito máis ambicioso, a construción dun novo centro de saúde en Porto do Son, infraestrutura que terá unha superficie de 1.800 m2.
“O novo centro aumentará de xeito significativo a capacidade asistencial incorporando máis consultas de medicina e de enfermería, ademais de dispoñer de novos servizos como odontoloxía ou fisioterapia e áreas específicas para pediatría e atención á muller”, explicou, ao tempo que engadiu que “xa está identificado o solar onde se emprazará o novo centro de saúde, nun lugar céntrico e accesíbel á cidadanía, e explicou que o Concello ultimou xa a unificación das parcelas necesarias para a súa construción”.
Apuntou que tan axiña “como o Concello poña os terreos á disposición da Xunta, o Executivo galego empezará a traballar de inmediato na redacción do proxecto básico e de execución para avanzar coa maior axilidade posible”. O conselleiro agarda poder iniciar este traballo xa o vindeiro ano.
