Un virulento incendio declarouse arredor das 17.45 horas deste luns 1 de setembro nun buque atracado no porto de Ribeira. A embarcación afectada é o Awadi, con bandeira de Mauritania, 50 metros de eslora e 780 toneladas de rexistro bruto. O seu porto base atópase en Nouadhibou, no norte do país africano.
Segundo as primeiras informacións, o barco estaba a ser reparado co obxectivo de retomar a súa actividade de pesca de arrastre na costa africana. Os traballos realizábanse esta tarde na sala de máquinas, lugar no que se iniciou o lume.
No punto mobilizouse un amplo operativo de emerxencias formado polos bombeiros, o GAEM de Ribeira, efectivos da Policía Nacional e Local, persoal de Salvamento Marítimo, Gardacostas e profesionais de Portos de Galicia.
Os equipos de extinción traballan intensamente para tratar de controlar as lapas. Os bombeiros realizan labores de extinción desde o propio buque, mentres que desde a patrulleira Mar de Galicia de Gardacostas trátase de arrefriar e combater o incendio desde o mar. Porén, debido á gravidade da situación, existen dúbidas sobre a posibilidade de conter o lume a curto prazo, polo que se prevé que os traballos se prolonguen durante o resto da xornada.
A pesar da virulencia do incendio, non se rexistraron persoas afectadas.
O arrastreiro levaba amarrado no porto de Ribeira desde o mes de abril, segundo o seu sistema de xeolocalización. O buque foi construído en 1980 no estaleiro noruegués Storviks Mekaniske Verksted baixo o nome de Anny Kraemer.
