A Asociación para a Defensa Ecolóxica de Galiza (ADEGA) inaugurou este 14 de agosto en Muros a exposición 50 anos coidando a terra, coa que conmemora medio século de traballo en defensa do medio ambiente galego. Permanecerá ata o 26 de agosto no Curro da Praza.
O proxecto expositivo foi posíbel grazas ao apoio da Deputación da Coruña e á implicación de persoas socias e simpatizantes que contribuíron na elaboración dos textos e na achega de imaxes históricas.
O acto de inauguración contou coa colaboración do Concello de Muros e coa participación da súa alcaldesa, María Lago, que agradeceu a ADEGA a achega desta mostra ao concello e fixo un convite a toda a veciñanza a visitala.
Ademais, reivindicou a presenza e papel de asociación “en todas aquelas causas que teñen no fondo a defensa do noso patrimonio natural e cultural”, ao tempo que tamén puxo en valor a educación ambiental como ferramenta para xerar conciencia e accionar cambios en prol do medio ambiente.
Neste sentido, destacou aquelas propostas que o Concello, xunto con ADEGA, desenvolve en ámbitos coma o da loita contra as especies exóticas invasoras.
Tamén tomou a palabra María Candamo, veciña de Louro e creadora de Lixo Atelier, un proxecto de artesanía, deseño e transformación de residuos que atopa nas praias en xoias únicas.
Moi involucrada nas múltiples limpezas que se organizaron no marco da recente crise dos granulados plásticos, María Candamo lembrou a “rabia e impotencia” daqueles momentos e puxo o foco na importancia de que existan asociacións ecoloxistas para a organización e formación de voluntariado ambiental.
A continuación, Xaime Beiro, tamén veciño de Louro e submarinista audiovisual, falou da necesidade de se xuntar e de “preocupármonos polo noso”. “Estamos diante dun problema serio de contaminación mariña e cambio climático que afecta o noso mar”, engadiu.
Fins Eirexas, secretario técnico de ADEGA, foi o encargado de conducir o acto e agradeceu a presenza de todas as persoas e entidades colaboradoras que se achegaron ata a praza.
