O escritor ribeirense José Antonio Ventoso (1954) presentará este xoves, ás 20.00 horas, no Museo Municipal de Ribeira, o seu último libro O mar goberna de oeste, unha novela histórica que rende homenaxe aos pescadores artesáns e á emblemática dorna.
A obra narra o último día de faena dun vello mariñeiro que, tras sufrir un ataque ao corazón en alta mar, revive os recordos de toda unha vida ligada ao océano. Ventoso reivindica con este relato a memoria, o esforzo e o legado de quen “levantou a ría de Arousa e a de Muros-Noia co seu traballo humilde, o seu saber e o seu risco, sen axudas e sen poñerse de xeonllos”.
Autor de 16 títulos que abarcan teatro, poesía, narrativa e ensaio, Ventoso iniciou a súa carreira literaria de forma tardía, como vía de escape a #o #estrés da política. Entre as súas obras destaca Heroes na néboa (2019), dedicado a figuras históricas do fútbol ribeirense.
Cunha traxectoria profesional marcada pola educación —foi profesor e director do CIFP Coroso— e o política —alcalde de Ribeira e parlamentario autonómico—, Ventoso afronta agora a súa xubilación dedicado plenamente á escritura. Sobre a súa nova obra afirma: “Con este libro pecho un círculo”, aínda que xa ten outros textos esperando a súa quenda no caixón.
