O BNG de Carnota vén de compartir un comunicado no que cualifica de “caótica” a situación que está a vivir o servizo de pediatría, e non só na localidade senón tamén en Muros, onde, segundo informan, “aténdese para toda a comarca unicamente 3 días á semana (luns, mércores e venres) ata ás 12 da mañá”. A formación nacionalista sinalou que “existe unha situación de desinformación que provoca que haxa usuarios da localidade que acudan cos seus fillos ou fillas a Muros, e que alí sexan derivados outra vez a Carnota; e no caso de urxencia, as crianzas de ata 3 anos teñen que desprazarse a Mazaricos ou Noia”, indicou o BNG, que lembrou que “Carnota non dispón de especialista pediátrico desde hai moitos meses, polo que as familias teñen que desprazarse ata Muros, onde agora o servizo está aínda máis abandonado polo SERGAS”.
Primitivo Pedrosa, dirixente dos nacionalistas no municipio, afirmou que “exiximos á Xunta de Galiza o restablecemento urxente e inmediato do servizo de pediatría no concello”.
Pedrosa insistiu en que “a situación vai de mal en peor e os responsábeis do Goberno galego non poden seguir mirando para outro lado mentres as familias están a sufrir o desleixo do SERGAS coa atención sanitaria”.Desde o BNG indicaron que recoñecen aos profesionais do Centro de Saúde de Carnota “a súa dedicación e compromiso xa que, ademais do seu servizo habitual, teñen que facerse cargo da atención a crianzas”.
