A conselleira do Mar, Marta Villaverde, animou ás peixerías galegas a seguir adheríndose ao Bono Peixe. Fíxoo este 23 de xullo dende Ribadeo, onde lembrou que o prazo para facelo iniciouse o pasado 11 de xullo e rematará co remate do programa, a mediados do mes de outubro. “Nestes doce días”, destacou, “un terzo (algo máis de 500) dos establecementos existentes (uns 1.600) xa se sumaron a esta iniciativa, dotada con 2,5 millóns de euros, e coa que a Xunta de Galicia prevé mobilizar uns 10 millóns de euros e beneficiar a unhas 150.000 persoas”.
Os bonos, que se poderán comezar a usar dentro de cinco días, terán formato dixital e deberán ser descargados polos usuarios previamente na web http://www.bonopeixe.gal . Desde este momento, e a través dun código QR, estarán dispoñíbeis para o seu uso nunha aplicación específica que permita realizar os pagamentos. No momento da compra, os usuarios deberán ir acompañados do seu DNI ou indicar o seu número de teléfono móbil para certificar que son beneficiarios desta iniciativa deseñada polo Goberno galego, destinada a “incentivar o consumo e de apoiar a actividade dos operadores comerciais minoristas, pero que son determinantes para garantir a seguridade alimentaria aos consumidores”.
Villaverde lembrou que os usuarios poderán empregar 5 euros semanais (cun 25% desconto por compra, ata ese límite), coa posibilidade de acumular o saldo non gastado ata un máximo de 25 euros, e que poderá usarse en sucesivas semanas (máximo dez) ou ata que se esgote o crédito.
