A Asociación Boirense de Empresas (ABE) comeza a dar forma á que será a súa campaña máis ambiciosa ata o momento: Boiro, Compras con Corazón, que se celebrará do 16 ao 23 de agosto co obxectivo de “converter as rúas de Boiro nun fervedoiro de vida, actividade e unión arredor dos negocios locais”.
Dende a ABE lembran que estsa iniciativa foi recoñecida como unha das cinco mellores de Galicia dentro do programa O Teu Comercio Local é Extraordinario da Xunta de Galicia, “un impulso que reforza o compromiso da ABE por seguir poñendo en valor o comercio de proximidade”, sinala a patronal.
Como primeiro adianto, a asociación compartiu este mércores 23 de xullo o cartel oficial da campaña, creado en exclusiva para esta ocasión pola ilustradora boirense Tahis Forján. Na contribución gráfica da campaña, “todas as personaxes e elementos gráficos son orixinais e deseñados especialmente para este proxecto, cun estilo fresco, colorido e cheo de simbolismo que transmite o latexo colectivo do comercio local”, salientan dende ABE.
O presidente da ABE, Daniel García, destaca: “Esta campaña é un paso decisivo para reforzar o comercio local de Boiro, unha fonte de riqueza económica e social para o noso municipio. Estamos emocionados de poder ofrecer unha acción tan completa e ilusionante, que, ademais, conta cunha imaxe que reflicte a creatividade da nosa xente. Con Boiro, Compras con Corazón queremos que toda a veciñanza sinta o orgullo de mercar e apoiar aos nosos establecementos”.
Durante toda a campaña haberá gastronomía, música, espectáculos, parque de inchábeis, agasallos e moitas sorpresas para todas as idades. O programa completo irase revelando pouco a pouco nos próximos días.
Un dos grandes atractivos será o gran sorteo final de 5.000 euros, o sábado 23 de agosto ás 21:30 horas na praza do Concello. Todos os clientes dos máis de 200 negocios asociados á ABE poderán participar neste sorteo e acceder a convites exclusivos para degustacións, inchábeis e outras actividades especiais. Son válidos os tíckets ou facturas de calquera establecemento asociado, reforzando así a forza dunha rede que impulsa a economía e a vida social de Boiro.
A ABE anima ás empresas que aínda non forman parte da asociación a “sumarse canto antes para que tamén os seus clientes poidan gozar dunha campaña extraordinaria que quere poñer en valor o comercio local como motor de dinamización económica e social”.
Desde a ABE, tamén queren expresar o seu agradecemento á Xunta de Galicia e ao Concello de Boiro pola súa colaboración e apoio, “especialmente pola confianza depositada ao seleccionar esta campaña como unha das cinco mellores da comunidade no marco do programa O Teu Comercio Local é Extraordinario”. A patronal engade que “esta elección supón un recoñecemento ao traballo e á implicación dos comerciantes locais, que día a día fan de Boiro un lugar vivo e próspero”.
A presentación oficial terá lugar o 12 de agosto. Ata entón, a ABE continuará compartindo novidades.
A campaña conta con financiamento da Xunta de Galicia e a colaboración do Concello de Boiro.
