O vindeiro mércores 23 de xullo, no marco da programación da Festa da Xouba de Rianxo 2025, o Pazo de Martelo acollerá a partir das 20:00 horas a proxección dos gañadores da mostra de cinema documental Mares da Fin do Mundo.
Koka, de Aliaksandr Tsymbaliuk, conta a historia dun pais e o seu fillo que se gañan a vida pescando nunha comunidade da costa do mar de Bering que parece ancorada fóra do tempo. A cámara de Aliaksandr Tsymbaliuk achéganos aos protagonistas, rexistrando tanto a dureza das súas condicións como o rigor da educación, suavizados polo amor paterno e a despreocupación universal da infancia.
Percebes, de Alexandra Ramires e Laura Gonçalves, co mar e o Algarve urbano como pano de fondo, permítenos seguir un ciclo completo da vida dos percebes. Dende a súa formación ata o prato, nesta viaxe atravesamos diferentes contextos que nos permiten comprender mellor esta rexión e as persoas que a habitan.
Voyage de documentation de Madame Anita Conti, de Louise Hémon, relata a espectacular historia de , Anita Conti, a primeira muller oceanógrafa de Francia, que se embarcou nun arrastreiro para compartir a dura vida dos pescadores de bacallau do Atlántico, soa coa súa cámara e sesenta homes durante seis meses. A partir dos seus rolos de 16 mm e das súas fotografías, a película revela a súa mirada científica e á vez tenra cara aos traballadores do mar. A película explora a modernidade da súa loita, así como a beleza brumosa e rítmica dos seus escritos e fotografías.
