— O primeiro tramo do desdobramento esténdese entre Brión e o enlace de Urdilde, cun prazo de execución de 18 meses.
O Consello da Xunta aprobou hoxe a licitación, por un importe de 11,2 millóns de euros, das obras de transformación en autovía dun tramo de 4,9 quilómetros da Vía de Altas Prestacións (VAP) Brión-Noia, concretamente entre os puntos quilométricos 11+640 e 16+600, entre Brión e o enlace de Urdilde.
Este proxecto corresponde ao primeiro dos treitos nos que se divide o desdobramento da estrada CG-1.5 e dá continuidade á aprobación, no pasado mes de febreiro, do proxecto de trazado da autovía entre Brión e Martelo, cun investimento global estimado superior aos 29 millóns de euros.
A nova infraestrutura contará con dúas calzadas, cada unha delas con dous carrís de 3,5 metros, beiravías exteriores de 2,5 metros e interiores dun metro, ademais dunha mediana de 3 metros entre plataformas. Esta configuración manterá a continuidade co deseño da autovía xa existente no tramo Santiago-Brión.
Dentro das actuacións previstas inclúese a adaptación do enlace coa AG-56 (autovía Santiago-Noia), onde se reconstruirán os noiros do desmonte na marxe esquerda para permitir o ancho necesario da nova sección. Tamén se prevé a supresión do ramal de entrada en Gundín, debido á imposibilidade de mantelo co novo trazado desdobrado. A Xunta asegura que se manterá o enlace de Urdilde, e os seus ramais serán adaptados á nova configuración de autovía.
