O vindeiro xoves 10 de xullo, ás 12:00 horas, terá lugar en Santiago de Compostela un roteiro histórico e cultural que percorrerá os pasos de Julio Silva Vilas, destacado sindicalista, xornalista e activista republicano, asasinado polo réxime franquista en xaneiro de 1937.
A actividade, de carácter gratuito, partirá da Alameda de Santiago, xunto á coñecida estatua das Marías, e será guiada polo historiador e profesor de ensino secundario José Antonio Pérez Fernández, autor do libro Diarios de Julio Silva, que recupera a memoria e os escritos deste intelectual silenciado pola represión franquista.
Este roteiro supón unha oportunidade única para afondar na historia local compostelá e na vida dun personaxe clave do republicanismo galego, cuxo compromiso coa liberdade, a cultura e a xustiza social marcou unha época convulsa e determinante da historia contemporánea de Galicia.
A actividade está organizada por Nova Escola Galega, en colaboración coa Revista Galega de Educación, e conta co apoio e financiamento do Concello de Santiago. Está limitada a 35 prazas, polo que é necesaria inscrición previa, a cal se pode realizar a través do código QR incluído no cartel ou escribindo ao correo electrónico neg@neg.gal.
Un acto de memoria histórica e pedagóxica que pretende visibilizar figuras esquecidas e dar voz aos que foron silenciados.
O guía deste roteiro é o profesor de ensino secundaria José Antonio Pérez Fernández, autor do libro “Diarios de Julio Silva”. Silva Vilas, foi secretario xeral da UGT en Ribeira, membro da Juventud Cultural Republicana e colaborador en xornais como La Lucha, RAIG e Ser. No seu diario, recuperado recentemente pola Comisión pola Recuperación da Memoria Histórica de Barbanza (CRMHB), reflíctense as súas ideas, as súas esperanzas e o medo crecente ante a persecución política que finalmente lle custou a vida.
Julio Silva foi detido tras o golpe de Estado de xullo de 1936 e xulgado en decembro dese ano en Santiago xunto con outros compañeiros e condenado a pena de morte. Os seus escritos, agora recompilados neste libro-álbum, permiten reconstruír non só a súa historia persoal, senón tamén o, contexto político e social da época.
Baseado nas memorias que escribiu no cárcere e que foron redactadas por José Antonio Pérez Fernández, este álbum ilustrado rescata a historia de Julio Silva, un barbeiro “cuxa vida simboliza a loita pola liberdade e a resistencia fronte á barbarie da Guerra Civil”.
