Juan Caballero. O nordeste, segundo a previsión meteorolóxica, será o que mande na XIV Regata CONGALSA – Volta a Sálvora, que organiza este sábado 5 de xullo o Club Náutico Deportivo de Ribeira.
Cunha participación que supera a vintena de unidades, a frota estará dividida nas tres categorías naturais do ORC: Regata, Regata/Cruceiro e Cruceiro, tendo por hora de saída o 14.00 h, dirección ao norte da illa que protexe a Ría de Arousa.
O Marítimo de Bouzas, os Reais de Portosín e Club Regatas de Galicia, o Arousa Norte, Club de Iates de Vilagarcía e o anfitrión de Ribeira son só algunhas grímpolas que estarán defendidas polos seus mellores embaixadores velísticos, entre os que destacan Chispetrén, Moucho, Zirralla Primeiro, Cámping Ría de Arousa, Orlando, Piko Norte, Corsario Thunder, ou Exit Manitú, algúns deles protagonistas dos últimos podios das regatas no Barbanza.
A edición de 2024 foi coroada por Peperetes-Nortemar, Ziralla Primeiro e Orlando, de José Manuel Millán, Ramón Barreiro e Gerardo Sánchez, respectivamente.
A entrega de premios está programada na media tarde do sábado, coa presenza confirmada de directivos de CONGALSA, empresa promotora da regata.
