O Concello de Muros celebra esta fin de semana, entre o venres 4 e o domingo 6 de xullo, a XX edición das Xornadas de Cultura Mariñeira, baixo o epígrafe Muros Mira ao Mar. A axenda de actividades vén con propostas para todas as idades. Serán, segundo fixo saber o Concello, tres días de mercado, concursos, obradoiros, visitas guiadas, demostracións grastronómicas e exposicións… actividades todas elas vinculadas co mar.
Na presentación das xornadas participaron a alcaldesa de Muros, María Lago; a concelleira de Cultura e Turismo, Caridad González; a concelleira de Lingua, Festexos e Promoción Económica, Laura Rivadeneira; a concelleira de Seguridade Cidadá, Sandra Maneiro, e o concelleiro de Deportes, Damián Torea.
O venres, haberá ademais concerto da ESMU, maxia, o conxuro da queimada e máis música polas rúas e prazas de Muros.
O sábado, circo, teatro e música con 9Louro e Susana Seivane, entre outros.
O domingo, fin de festa co Festival folclórico coa AF Ximiela, AC Ponte Vella, Grupo de música tradicional de Outes, As Carameleiras do Tremuzo e AC Princesa Dácil.
A alcaldesa, María Lago, destacou “a implicación de novo do tecido asociativo local e da veciñanza”, mentres que Caridad González destacou “a traxectoria destas xornadas durante 20 anos, ata ser xa unha referencia en Galicia ”. Laura Rivadeneira lembrou que “a realidade é que Muros mira ao mar todo o ano, aínda que nestes días compartimos a nosa esencia con toda a veciñanza e os que nos visitan”.
O concello recibiu para a celebración deste evento unha subvención da área de Promoción Económica da Deputación da Coruña.
