A Pobra do Caramiñal converterase esta fin de semana nun referente no ámbito da odontoloxía coa celebración do Simposio Internacional sobre Implantes, que reunirá na localidade a 150 profesionais do sector. O evento está organizado pola Atlantic Dental Institute e a multinacional sueca Nobel Biocare, e terá lugar os días 28 e 29 de xuño.
Durante dous días, expertos nacionais e internacionais abordarán os últimos avances en implantoloxía dental, con especial atención ao maneixo de tecidos brandos e duros, así como ás novas tecnoloxías dixitais aplicadas ao sector.
O doutor Gonzalo López, presidente do comité organizador, destacou a importancia de achegar este tipo de eventos a contornas fóra dos grandes núcleos urbanos, e sinalou que “a implantoloxía moderna non se pode entender sen unha visión integral da saúde oral”.
Entre os relatorios máis destacados figuran os dos doutores Gustavo Giordani e Sergio García Bellosta, que abordarán cuestións como o tratamento de zonas estéticas e protocolos cirúrxicos simplificados. Tamén se tratarán técnicas de cirurxía guiada, o uso de fluídos de plasma ou a rexeneración ósea.
