O macroevento gastronómico itinerante Burger Experience, organizado por Discovery Producións en colaboración co Concello A Pobra do Caramiñal, aterra na Pobra do Caramiñal o xoves 3 de xullo e prolongarase ata o domingo 6 de xullo, na praza Segundo Durán. Durante catro días, os amantes das hamburguesas poderán gozar dunha auténtica experiencia gourmet ao aire libre.
Máis de dez food trucks provenientes de restaurantes de toda España competirán presentando máis de 20 variedades de hamburguesas. Farano “nun campionato único onde o público é o protagonista”, en palabras da organización, que engade que as persoas asistentes poderán degustar e votar polas súas creacións favoritas e que as hamburguesas máis votadas pasarán á gran final, que será “un evento especial e cheo de sorpresas”.
Burguer Experience é ademais un evento que atende as diversidades. Ademais de opcións para persoas celíacas, tamén se ofrecerá menú infantil, para que os máis pequenos poidan gozar da súa propia experiencia a medida.
Para os amantes das sobremesas, o evento contará cun food truck especializado en tortas de queixo.
“Non se trata só dun festival gastronómico, senón un plan familiar completo, con música en directo, un ambiente animado e a oportunidade de gozar das mellores hamburguesas da tempada nun espazo cómodo e seguro”, explican dende a organización. ç
A experiencia xa se celebrou con éxito en Ribadeo, Ribeira e Ferrol. Tralo seu paso pola Pobra do Caramiñal, chegará a Nigrán (do 10 ao 13 de xullo) e a Boiro (do 17 ao 20 de xullo).
Detrás deste evento atópase Discovery Producións, nada a finais de 2023 baixo a dirección de Alberto Monsalvo.
A cita na Pobra do Caramiñal
Lugar:
Praza Segundo Durán
Acceso libre ata completar aforo
Data:
Do 3 ao 6 de xullo
Horario:
Xoves: 19:00h. a 23:00h.
Venres: 19:00h. a 1:00h.
Sábado: 12:00h. a 1:00h.
Domingo: 12:00h. a 23:00h.
