A Asociación Boirense de Empresas (ABE) vén de pechar a súa campaña Dá a cara polo comercio local cun balance moi positivo: 219 persoas participaron nas votacións a través da web da entidade empresarial, elixindo a súa frase favorita entre as oito propostas protagonizadas por familias reais de Boiro.
A frase máis votada da campaña foi: “Cada vez que apostamos polo local, dicímoslles ás nosas fillas que aquí tamén hai FUTURO”, que acadou o 24,7 % dos votos.
A acción, visíbel en máis de vinte puntos da vila mediante pancartas, lonas e monólitos, apostou por dar voz á cidadanía e reforzar o valor do comercio de proximidade como parte da vida cotiá.
Como recoñecemento á implicación da veciñanza, a ABE sorteou tres lotes de agasallos entre todas as persoas participantes, que inclúen un reloxo intelixente (smartwatch) uns auriculares sen fíos e un bono de compra de 100 €.
Finalmente as persoas gañadoras foron Rosalba Ruiz Lojo, María Luisa Lojo Lojo e Patricia Míguez.
As tres recibirán os seus agasallos nos próximos días.
“Esta campaña foi unha maneira diferente de conectar co público, poñendo rostro e mensaxe a algo tan importante como é mercar no comercio local. Queremos agradecer a enorme resposta da xente e seguir traballando en accións que dean visibilidade aos nosos negocios”, sinalou Daniel García, presidente da ABE.
A campaña estivo co-financiada pola Xunta de Galicia e contou coa colaboración do Concello de Boiro. Os elementos visuais da campaña permanecerán nas rúas ata o 31 de agosto, mantendo viva a mensaxe de que mercar en Boiro é apostar por un pobo con vida e futuro.
