“Abrigo e acubillo” é o nome do proxecto solidario que SOGAPS (Solidariedade Galega co Pobo Saharaui) puxo en marcha nos centros educativos de Infantil e Primaria de Rianxo para dar a coñecer a realidade dos campamentos de refuxiados saharauís e recadar apoios para o programa Vacacións en Paz 2025.
Dende o mes de abril, o alumnado dos colexios CEIP ADR Castelao, CEIP Ana María Diéguez, CEP Xosé María Brea Segade e CRA de Rianxo decorou retallos de tea que se empregarán para confeccionar colchas solidarias. Estas colchas serán sorteadas nun festival que se celebrará o vindeiro 19 de xuño, ás 19:30, no CEP Xosé María Brea Segade.
Previamente, voluntarios de SOGAPS impartiron charlas informativas nas escolas para dar a coñecer a situación nos campamentos de refuxiados saharauís e o funcionamento do proxecto Vacacións en Paz, que proporciona a nenas e nenos saharauís a posibilidade de pasar o verán en Galicia, lonxe das difíciles condicións nas que están a vivir.
