Adecco, a división do Grupo Adecco especializada en flexibilidade e talento, desembarca na comarca do Barbanza (Galicia) cun dobre obxectivo: xerar emprego na zona e converterse nun socio estratéxico para as empresas locais e os profesionais da zona. Faino coa apertura dunha nova oficina en Boiro e o lanzamento dunha oferta para incorporar a máis de 300 operarios/as na industria conserveira, en palabras da empresa “un dos motores económicos da contorna”. Adecco informa que as funcións dos traballadores serán o empaquetado, despezamento e limpeza do peixe e os requisitos para acceder a estes postos son “ter dispoñibilidade de incorporación inmediata e residir preto da zona”. Doutra banda, ofrécese xornada completa a quendas rotativas de luns a venres e posibilidade de estabilización en empresa.
Segundo informa a empresa, “o obxectivo non é só cubrir vacantes, senón ofrecer unha proposta de valor a longo prazo: nutrir ao sector con talento cualificado, reducir o desaxuste entre a oferta e a demanda de perfís clave e mellorar a empregabilidade dos traballadores locais”. Para iso, Adecco puxo en marcha “un modelo que combina empregabilidade, formación continua e flexibilidade legal , adaptado ás necesidades e características específicas do tecido empresarial de Barbanza”, explicaron dende Adecco Boiro, engadindo que ademais de impulsar a contratación directa, a firma favorece a inclusión laboral de persoas desempregadas ou en procura de emprego, e aposta polo desenvolvemento de quen xa están a traballar, pero queren seguir desenvolvéndose. A través das súas escolas profesionais, a compañía capacita tanto a persoas sen experiencia como a profesionais en activo , dotándolles das competencias necesarias para desempeñar as súas funcións de forma máis eficiente e produtiva.
“O noso obxectivo principal é dar resposta ás necesidades da contorna, conectando oportunidades laborais con talento local. Queremos ser un aliado para as empresas e un facilitador do desenvolvemento profesional das persoas”, expresa Noel Muiños, director da oficina de Adecco en Boiro.
Así mesmo, o modelo de actuación de Adecco en Boiro inclúe “estruturas contractuais flexíbeis, adaptadas aos requirimentos do mercado e con total garantía xurídica, o que permite ás compañías operar con seguridade e eficiencia nun contexto de elevada estacionalidade e esixencia operativa”.
